— Скъолайы æгъгъæд акастис нæ лæппу, хъуамæ йæ ныр куысты ныллæууын кæнон, — загъта иу бон Додойты Бибо йе ‘фсин Сæлимæтæн. — Хорз, — загъта Сæлимæт. Ус æндæр цы загътаид! Кæд лæг афтæ сфæнд кодта, уæд, æвæццæгæн, афтæ хъæуы.
Уыцы рæстæджы Бибойы иунæг лæппу Мырзæгыл цыдис дыууадæс азы. Уыдис цъæхдзаст æмæ бурхил — раст йæ фыды къопи. Горæты, æфсæйнаджы дуканийы йæ куы ныууагътой, уæд иучысыл акуыдта, иу къуырийы бæрц ахъыг кодта — мысыдис йæ ныййарджыты хæдзар, фæлæ уый фæстæ йе ‘мбæлттимæ ацахуыр ис æмæ йæм уæд горæты цæрын дзæбæх кæсын дæр ма байдыдта.
Дуканийы Мырзæг куыста куы цумайæ, куы ахорæнтæ змæста, куы дукани æфснайдта, куы та-иу хицауы фатеры лæггад кодта. Мырзæг зæрдæргъæвд лæппу уыдис. Хъæуы скъолайы уый хорз базыдта кæсын, фыссын, ам, горæты та йын цыдæриддæр уæгъд рæстæг задис, уый хардз кодта чингуытæ кæсыныл. Нудæс азы йыл куы ацыдис, уæд йæ ныййарджытæ фæд-фæдыл амардысты, æмæ иудадзыг йæхи бар баззадис. Хорз æм нæ кастис æфсæйнаджы дуканийы куыст, куыд хъуыста йæ зонгæтæй, афтæмæй хъуымацы дуканийы куыст бирæ сыгъдæгдæр хъуамæ уыдаид, стæй дзы цыдæр амалтæн гæнæн цыма ис, афтæ йæм кастис. Баивта Мырзæг йæхи фæндонæй хъуымацы дуканимæ. Цыбыр рæстæджы дзы тынг сдæсны ис хъуымац барынмæ. Цæст нæ хæцыдис йæ къухтыл. Фондз адылийæ æнцонæй æхсæз адылийы уайын кодта. Дуканийы хицау дæр цинæй мардис, ахæм приказчикыл кæй фæхæст ис, ууыл.
Иухатт басидтис хицау Мырзæгмæ æмæ йæ фæрсы:
— Кæрц фæлдахын цы у, уый зоныс?
Дзæгъæлы фарста уымæй хицау Мырзæджы — Мырзæг арф æмбæрста кæрц фæлдахыны хъуыддæгтæ. Уæдæ ма æндæр цæй кой уыдис приказчиктæм, кæрæдзиуыл-иу куы фембæлдысты, уæд! Уæдæ ма æндæр цæмæн бæллыдысты приказчиктæй бирæтæ — сæхæдæг дуканийы хицæуттæ куы суаиккой æмæ кæрцытæ куы фæлдахиккой! Фæлæ, æвæццæгæн, æппæтæй фылдæр æмбæрста уыцы хъуыддаг Мырзæг.
Уый бирæ хъуыдытæ кодта кæрц фæлдахыны тыххæй, бирæ фæндтæ гуырдис йæ сæрымагъзы, фæлæ сæ никæмæн хъæр кодта.
Хицау куы бафарста Мырзæджы, цы у кæрц фæлдахын, зæгъгæ, уæд уый æвиппайды, фырцинæй, дзурын дæр ницы сарæхстис. Æрæджиау сдзырдта: — Кæрц æз хорз афæлдахдзынæн.
— Зонгæ йæ кæныс?
— Кæрц æз хорз афæлдахдзынæн, кæд æй фæлдахын хъæуы, уæд. Уыцы сахат дуканийы хицау бамбæрста, ацы адæймаджы ахуыр кæнын кæй нæ хъæуы, уый æмæ йын загъта:
— Хæстæгдæр æртæ-цыппар боны афæлдах кæрц! Дæс туманы дын ратдзынæн.
— Уый нæ уыдзæн, æри дæс æмæ ссæдз туманы!
Ацы ран дуканийы хицау бамбæрста, Мырзæг æхцайæн дæр аргъ кæй зоны, уый æмæ загъта:
— Хорз, ратдзынæн дын дæс æмæ ссæдз туманы.
Мырзæг афæлдæхта кæрц. Дуканийы хуыздæр хъуымæцтæ цы уыдис, уыдон аивæй æндæр дуканитæм алæвæрдта, æмбæхсгæ дæр дзы бакодта. Дуканийы ма чысыл цыдæр муртæ аззадис. Хæстæгдæр æхсæвтæй иуы дукани ссыгъдис. Ацу æмæ равзар, цы дзы уыдис, цас дзы уыдис, цæй аргъ дзы уыдис! Хъуымæцты сыгъ